ഒരു നല്ല നായ എങ്ങനെയായിരിക്കണം - 4

ആധുനിക കാലത്തെ നല്ല നായകൾ അരിഭക്ഷണവും മീൻ കറിയും ഒഴിവാക്കണം. റഷ്യയിലേയും ചൈനയിലേയും വിയറ്റ് നാമിലേയും കൊറിയയിലേയും മനുഷ്യരുടെ പരമ്പരാഗത ഭക്ഷണം അരിയും മീനും ചേർന്നതായിരുന്നു; ഇപ്പോൾ താത് കാലികമായെങ്കിലും അതിന് ഒരു മാറ്റം കണ്ടു വരുന്നുണ്ട്. മനുഷ്യരുടെ ഉച്ഛിഷ്ടം കഴിക്കുന്നവരായത് കൊണ്ട് നമ്മളും ഈ പ്രശ്നത്തെ സഗൌരവം വീക്ഷിക്കേണ്ടിയിരിക്കുന്നു. ഭാരതത്തിൽ ചോറും മീനും കൂടുതലായി കഴിച്ചിരുന്നവർ ബംഗാൾ, ത്രിപുര, കേരളം എന്നീ സംസ്ഥാനങ്ങളിലെ മനുഷ്യരായിരുന്നു. (നാഗാലാൻഡുകാർ നമ്മെ കൊന്ന് തിന്നാണ് വിശപ്പടക്കുന്നതെന്ന് കേട്ടിട്ടുണ്ട്). (ക്യൂബാ മുകുന്ദൻ സ്ഥലത്തല്ലാത്തതിനാൽ ക്യൂബയിലെ വിവരം ലഭ്യമല്ല). കർണ്ണാടകയിലും തമിഴ് നാട്ടിലും ചോറ് കഴിക്കുന്നവർ ധാരാളം ഉണ്ടെങ്കിലും ചോറും മീനുമെന്ന കോമ്പിനേഷൻ കുറവ് തന്നെ. അതേ സമയം ഭാരതത്തിലുടനീളം ചില പോക്കറ്റുകളിൽ ചോറും മീനും കോമ്പിനേഷനായി കഴിക്കുന്നവർ ജീവിക്കുന്നുണ്ടുതാനും; എന്തിന് ഡൽഹിയിൽ പോലുമുണ്ട്.

ഇപ്പോൾ നമ്മുടെ മുന്നിലുള്ള ദാർശനിക പ്രശ്നം ചോറും മീനും സ്ഥിരം ഉച്ഛിഷ്ടമായി കഴിക്കേണ്ടി വരുന്ന നായകൾക്ക് പ്രായം കൂടുമ്പോഴുണ്ടാകുന്ന ബുദ്ധിമാന്ദ്യം എങ്ങനെ മറികടക്കണം എന്നതും ദാനമായി ലഭിക്കുന്ന ഭക്ഷണം ഒഴിവാക്കി എങ്ങനെ സ്വന്തം നിലയിൽ ഭക്ഷണം കണ്ടെത്തണം എന്നുള്ളതുമാണ്. ഗോതമ്പ് കൂടുതലായി കഴിക്കുന്ന യൂറോപ്യൻ നായ സമൂഹവും അമേരിക്കൻ നായ സമൂഹവും നമ്മേക്കാൾ ഒരു പടി മുന്നിലാണെന്നത് ഒരു നഗ്നസത്യം മാത്രമാണ്.

എനിക്ക് നിങ്ങളോട് പറയാനുള്ളത് അരിഭക്ഷണം കഴിക്കുന്നവർക്ക് ബുദ്ധിയുണ്ടാകും എന്നത് നിങ്ങളുടെ തെറ്റിദ്ധാരണ മാത്രമാണെന്നാണ്. നമ്മൾ, അതായത് നല്ല നായകൾ, ഗോതമ്പിലേക്ക് മാറേണ്ടിയിരിക്കുന്നു.